السلام عليكم ورحمةالله وبركاته اخواني واخواتي الله يسعدكم اليوم بحكي لكم قصه صارت علي في يوم من الايام تحلمت في امي الله يرحمها وطلبت مني اساعد بنت صغيره والله مااعرفها بس قالت لي اسم ابوها وهوقريب لنا وخصوصا من امي وساكن في ديرتنا رحت له اليوم الثاني صليت المغرب جنب بيتهم وقابلته وعزمني ورحت معه البيت اول ماجلست قلت له الحمدلله ادورك من البارح ونفسي اشوفك قال ليه قلت امي جتني في الحلم ووصتني على بنت اسمها مها عندك بنت اسمها مها قال ايوه هذي بنتي من طليقتي قلت بالله نادها ابي اشوفها والله يوم شفتها نزلت دمعه وعرفت انها عايشه في عذاب زوجة الاب الي انا جربته وطلعت من عنده على اني ارجع بكره نكمل حديثنا ورحت لقرايب مها الي ساكنين عندنا في الطايف لان امها وجدانها في الرياض جدها لامها خوي مع سلطان الخير الله يرحمه
وبعد ماسالت قرايبها الي في الطايف قالولي ان البنت من صغرها امها ماشافتها الا ساعات قليله والاب حارم بنته من شوفة امها وزوجته تعذب البنت وتضربها من خمس سنين وبينهم محاكم اخوان الزوجه واهلها رافعين عليه قضيه وماحكم لهم القاضي قلت الله يسعدكم لااحد يتدخل واتصل في اهل امها وقولهم يعطوني فرصه بحاول الين راسه ثاني يوم رحت له ايضا المغرب وسالته انت يعني من كثر حبك لها مخلي البنت عندك قال لا والله بس ليه يشتكوني وابي طليقتي تتادب وانقهرت قلت طيب البنت وش ذنبها تتدخلها في التحدي بينكم تراها بنتك لحمك ودمك البنت تعيش عند امه احسن وزوجتك والله ماتتحملها وبعدين انا شفت البنت مااحد يعتني فيها حتى شعرها ماهو ممشطينه طلبتك طلب انساني تترك البنت تعيش عند امها يمكن لو ولد اسهل بس البنت صعب تعيش بدون ام وجلست اتكلم معاه الى صلاة الفجر مارضي راسه ناشفه ورجعت له ثاني يوم وثالث يوم وجلست اسبوعين اتردد عليه واطلبه مارضي قلت مالي الا اتقرب اكثر منه رغم ان دمه ثقيل واخذته على جده ورحنا للبحر وادلعه وربي خسرت كثير على شان اكسبه ويفرج لبنته وغداه وعشاه من احلى المطاعم واخذه للبحر قلت يمكن اليود يخليه يوافق نفس الشي راسه يابسه انا اذكر مسبح في حي الزهرا يسبحون فيه اطفال طرت على بالي فكره واخذته للمسبح وجلسنا وطلبت ليمون ونتفرج على الاطفال وهم يلعبون في المويه ومبسوطين قلت له تشوف السعاده في وجيه البنات الصغار قال ياحليلهم قلت طيب تشوف امهاتهم كيف قلقانين عليهم وجالسات في الشمس ومتحملات على شان بناتهم جلس يفكر شوي قال ياخي هم ليه يشتكوني قلت ياخي انت غبي وش ذنب البنت في الي صار بينكم بلعكس تبي تقهرها منك خلها تزورهم طبعا انا غيرت طلبي الي كان في الاول انها تعيش معها على طول وقلت بلتدريج احسن وافق قال الاسبوع الجاي بوديها الرياض قلت لا ارتاح بطلب من خوالها يودونها لامهم زياره قال لا اخاف ماعاد ترجع قلت انت تتكلم مع رجال والوعد مني متى ماتبيها تلقاها قدامك قال طيب شرط انت الي توديها او تكون مع خالها قلت ولايهمك وسافرت على سيارتي انا والبنت وخالها اول ماوصلت الرياض اخذت لي فندق وهو راح يودي البنت لامها ونمت ورجعت الطايف جلست البنت اسبوع وبعدها جاني البيت بس الحمدلله ماسال عن البنت كان يبينا نلعب بلياردو وبعد مالعبنا قال والله ياثامراني اعزك ودخلت قلبي قلت اذا فعلا تعزني خل البنت تعيش مع امها على طول واكسب الاجر واوعدك متى ماحبيت تشوفها انا اجيبها لك قال تم وربي من الفرحك كسرت عصا البلياردو قال ليه فرحان قلت فرحان لسببين الاول اني حققت رغبة امي والثانيه على شان البنت الان لها شهرين عند امها وفرحان لها الله يسعدها النهايه اسف اختصرت القصه جلست 4 شهور احاول فيه لين وافق وتحملت غثاه وبخله
قصه حقيقه ولد يحلم في ابنه صغيره*
2012-01-28, 23:37
موضوع: قصه حقيقه ولد يحلم في ابنه صغيره* 
